〔轉載: 中華煤氣Facebook，2022年9月28日〕
煤氣公司高層：點先做到聽朝唔使做呢？
作為打工仔，有邊個唔想做少啲、唔使做？🤷🏻喺煤氣公司負責採購同供應鏈超過30年嘅Felix，一直嘅工作理念都係：「如果你討厭手頭上其中一項工作，最好諗吓有咩方法，令你第二朝返嚟唔使做🧏🏻（呢樣嘢）。」
佢認為，一間公司要進步，最好就係鼓勵同事一齊畀意見「點樣先可以唔使做」。呢個信念，一直推動公司轉變，近來採購部門由買一支鉛筆✏️，到買煤氣燃料🛢，都採用一個聰明啲嘅方法做得環保啲。
———
大家好，我係Felix。從事採購同供應鏈工作超過30年，一畢業我由倉務開始📦，做到採購🛒，每一日諗緊，點樣聽日返工可以做少啲。
✺ 做倉 ＝ 落後同冇前途？✺
講起倉務，好多人都覺得辛苦又無前途，有得揀都會揀坐Office歎冷氣。但我個人比較鍾意運動🏃🏻，做倉可以唔使坐定定就啱晒我。當時，公司規劃喺北角起一棟全新嘅煤氣大廈，大廈入面嘅6至11樓都係貨倉，嗰時我同英國顧問去傾，幫手成個貨倉嘅設計同建造。
貨倉落成之後，我見到倉冇電腦，就提議「不如整部電腦啦，做吓Excel都好嘛👨🏻💻」。大老闆又OK喎，咁就開始將啲數入落電腦做紀錄🗂。喺倉搬嘢太辛苦？我哋都積極諗一啲創新嘅方法去提升效率。近呢幾年，同事就建議引入新型嘅跟住人走嘅「Follow-me鏟車」同「真空搬貨吸盤機」，仲有AGV自動分貨系統同手機應用程式等，進一步令大家「用少啲力，做多啲嘢」。
✺ 採購即係買餸？✺
至於採購，好多人平時唔會接觸到呢個部門，聽到「採購」兩個字都一頭霧水。呢個部門看似平凡，但其實非常重要，要由內到外咁照顧成間公司嘅需要。小至幫大家採購文具、蒸餾水、咖啡豆，大至幫公司業務揀供應商，進口天然氣，甚至係煤氣管道，都由我哋一手包辦🖐🏻。
買公司物資就簡單啲，同供應商傾好物流安排同價錢之後，同事只係要網上落單同收貨就得；買煤氣原材料嗰啲就複雜得多，要睇吓邊度有原材料，價錢係現貨價定有數計，仲有應變措施、合約詳情等等。依家仲多咗樣考慮 —— ESG（Environmental, Social and Governance）🌍。
✺ 買文具、燃料都計碳排放 ✺
以前大家出街買嘢，只係著重價錢同質素，但近年，大家開始會睇埋係咪認同商家嘅價值觀，所以先出現公平貿易、有機產品等。煤氣公司都一樣，會考慮價錢以外嘅元素，而當中最重要嘅，就係供應商嘅環保做成點♻️。
我哋希望合作嘅供應商，都會控制同減少碳排放，但每次向供應商攞環保表現數據都花唔少時間，而且唔係所有供應商都知道要提供邊類數據。有同事就提出用科技簡化成件事。於是，公司最新試用由SGS團隊開發、在Microsoft Azure運行嘅平台 —— S-Carbon系統，鼓勵供應商上載同匯報碳排放相關資料👨🏻💻。比較進步嘅供應商，可以上載詳細資料，但一啲啱啱起步嘅，就可以簡單提供用電量同業務性質。平台會結合其他大數據，估算出唔同供應商每年嘅碳排放📊。
我哋就會用呢啲資料，作為篩選供應商嘅參考，亦都希望推動供應商落力啲減少碳排放，進一步完善成條供應鏈嘅電子化報價同採購流程📈。
作為亞洲地區第一間應用呢個系統嘅公用事業機構，我哋當然想喺推動環保方面行得愈前愈好！要做到呢樣嘢，就要靠啲同事不斷創新，大家齊齊做少啲，但做好啲！💪🏻
香港中華煤氣有限公司
企業物料供應及行政總監
李健明 Felix Lee
沒有留言:
張貼留言