「有得食好食」的啟示

轉載: 《Anlife 》，2022年5月20日

https://www.facebook.com/135198050301655/posts/1308499286304853/

作者: 黃偉康 (安里控股主席兼行政總裁)

早幾日同一個好耐冇見嘅朋友食飯，見到佢愁眉苦臉，不斷口噏噏咁講：「有得食好食啦！」真係以為餐飯係「解穢酒」。個朋友咁愁嘅原因，係因為佢聽到政府專家話第六波即將爆發，唔知幾時又冇得晚市堂食，所以就算餐飯有幾好食都好，佢都係充滿住離愁別緒嘅感覺！

見到佢咁樣，諗住用袁國勇教授話唔使驚嘅言論安慰佢，點知佢反問：「袁國勇教授信得過咩？」聽到佢咁樣講，夾緊嗰舊叉燒都跌返落隻碟度。作為病毒學嘅權威，如果袁國勇教授都信唔過，咁可以信邊個？不過呢位朋友即時回應，佢話佢唔係對袁國勇教授嘅專業有所質疑，而係對佢嘅建議會唔會被接納，有所懷疑。

諗深一層又係喎，香港已經經歷咗五波疫情，由第一波完結開始，香港人係充滿期望，覺得已經戰勝疫情。諗唔到第二波跟住出現，之後劇情嘅發展亦都唔使多講，食肆、戲院、健身中心、卡拉OK⋯⋯ 呢啲場所又開又閂，大家早已經習以為常，本應同三五知己、親朋戚友坐低食餐飯係一件正常不過嘅事情，依家都好似係一種恩賜，要睇自己好唔好運。所以朋友講嗰句「有得食好食」，甚至乎「有得玩好玩」，似乎都真係至理名言。

係咪太悲觀？咁究竟香港而家嘅抗疫政策係咩先？與「病毒共存」已經成為禁忌詞語。當然依家日日仲有幾百宗確診個案，呢個詞語究竟啱唔啱用，其實見仁見智，但既然連袁國勇教授都話唔想再拗，咁就無謂討論啦！不過香港又係唔係繼續跟隨緊國家嘅步伐，實施「動態清零」？如果係嘅話，依家應該要封區甚至封城進行全民檢測，不過連仲有個幾月就卸任嘅特首林鄭至今都冇正面解釋過咩叫做「動態清零」，又或者香港點樣實施「動態清零」，似乎都冇官員可以一錘定音，咁香港市民又應該點樣跟？

正因為到依家都冇一個清晰嘅路線圖，所以嚟緊會唔會有第六波，唔同嘅專家、唔同嘅學者、唔同嘅議員，都有唔同嘅諗法，同時佢哋嘅諗法，邊一個會最終被特區政府接納，冇人知道，所以「有得食就好食」，其實真係一個最佳嘅應對方法。

當然，呢種咁消極嘅諗法，其實唔係咁啱。試諗吓，如果香港係一間上市公司，入邊嘅管理層、顧問、非執行董事每個人都可以就住公司嘅發展路向，一人一句、毫無默契咁公開講唔同嘅策略，呢間上市公司嘅投資者仲點會有信心，唔沽貨走人可能只係愛，亦可能係窮、止蝕唔切被迫做蟹！

所以當商經局局長邱騰華仲花時間咁去同日本領事館討論香港人去日本嘅事宜，其實佢有冇諗過香港抗疫路線圖仍然模糊不清？近期先有專家講第六波即將爆發，咁點解日本仲要放寬香港人嘅入境規定先？而且，日本人嚟香港都仲要繼續接受隔離，同一時間香港嘅抗疫態度仍然係高度戒備，咁包括日本在內嘅其他國家，自然會覺得香港疫情仍然未穩定，咁要人哋放寬香港人入境嘅限制，又係咩道理先？

所以邱騰華局長與其嘥時間去說服人哋，倒不如花多啲時間搞好內部分歧先啦，因為香港內部對抗疫都冇共識，繼續一人一句，對抗疫各自表述，同時香港人嘅心態仍然係「有得食好食」，外面嘅人又會點睇香港？同時又點會願意放寬香港人嘅入境規定？