轉載: 「能源百科」，2022年6月4日
原來Tesla係由馬斯克（Elon Musk）心目中嘅「最差同事」創立，佢個名叫做Martin Eberhard 👨🏼。
自從馬斯克成為咗Tesla嘅靈魂人物，好少人仲會記得Martin同佢拍檔Marc Tarpenning先係Tesla嘅創辦人。今日我哋就想講下Martin呢位「真．電動車之父」嘅故事。
Martin係位好出色嘅工程師，擁有多項技術專利，仲係「用鋰電池造電動跑車」嘅先驅。90年代嗰陣，手提電話、掌上電腦等開始盛行，Martin就同拍檔Marc利用行動裝置嘅電池技術，研發咗元祖級電子書閱讀器Rocket eBook 📖（同而家Kindle或Kobo個樣好似㗎，詳情可睇留言）。第一代Rocket eBook係用鎳氫電池，第二代就轉用鋰電池並且成功咗。
因為咁，Martin覺得鋰電池絕對係潛能無限！佢開始思考，有冇可能用佢哋掌握嘅技術，研發一個唔只管理到2粒電池，而係可以管理接近7000粒電池嘅電池管理系統。🔋
一開始，Marc覺得開一間電動車公司呢個諗法真係好癡線。事關當時大部份電動車項目都係失敗收場，好多人覺得電動車續航力差又唔好操控，難以取代內燃引擎。但Martin自細對車情有獨鍾，所以佢做咗好多研究同資料搜集，最終說服到Marc同佢喺2003年一齊建立Tesla Motors，並搵到馬斯克做投資者。💰
3年過去，第一架有型靚仔、加速快、續航力好嘅電動跑車Tesla Roadster 🚙 面世，當時Martin喺記者會上同傳媒講：「矽谷嘅IT人依家就去教傳統汽車廠，點樣做一架令人驚艷嘅零排放汽車！」而Tesla嘅電池技術，的確鍊贏傳統車廠幾條街，改變咗大眾對電動車嘅睇法。但原來Tesla之後嘅成功，Martin已經無份參與。
去到2007年尾，即係Roadster正式推出市場之前，Martin已經被董事會褫奪咗CEO職銜，從此Martin就同馬斯克就分道揚鑣。Martin後來仲告過馬斯克添！而馬斯克亦對Martin好不滿，話佢管理不善，令到公司人才流失，供應鏈管理頻頻出錯等等，又對Tesla Roadster嘅真實成本同時間表有所欺瞞，話佢差啲就置Tesla於死地。🤯
Martin走嘅時候，賣咗好多手上嘅Tesla股份，或多或少反映出佢唔睇好馬斯克領導下嘅Tesla。唔知佢今日望返轉頭，又有冇後悔自己當初嘅決定呢？🤦🏼♂️
你又覺得，Tesla有今日既成就，係Martin功勞大啲，定馬斯克功勞大啲呢？留言一齊傾下！
沒有留言:
張貼留言