「食七」、「解慰」、「纓紅」的典故

「解慰酒」及「纓紅宴」；好多人都以為同一樣嘢。 

俗以為係「英雄」，其實正確名稱 「纓紅」，亦有典故。 

按照廣東人傳統習俗，辦喪事後 (即先人上山後) ，家屬都會安排酒菜招待親朋戚友，如果葬禮後仍需要做法事，完成法事後設嘅酒菜叫做「解慰酒」。 

食「解慰酒」指仍帶孝在身，直至守孝完畢至設「纓紅宴」。守孝時間通常係七七四十九日，因為每個「七」都會打齋(俗稱做七)，法事過後，家屬都會招待親友飲食齋菜，期間俗稱「食七」，但仍有部份古老客家人、圍村人守孝一年至設「纓紅宴」脱孝。 

「纓紅宴」，指家屬於先人下葬或火化後唔再做法事，其後家屬所設嘅酒菜叫做「纓紅宴」，現今社會大部份都人生活繁忙，通常選擇設「纓紅宴」，表示已脱孝。 

「解慰酒」通常以七道素菜及一款糖水為一席，「解慰酒」通常將甜品作為第一道菜，次序倒轉食，意思希望將先人福蔭留俾子孫。 

「纓紅宴」通常以八道葷菜及一款糖水為一席，如紅皮赤壯燒肉、東江油鹽雞....之後紅豆沙...等等。 

「解慰酒」，故名思義食後能解憂傷、安慰。

「纓紅宴」，纓紅指纒繞紅事，食後能有纒繞不盡之紅事來。